Connect with us

Lajme

Aksidentet ua morën jetën e 5 qytetarëve sot në Kosovë

Published

on

aksidentet-ua-moren-jeten-e-5-qytetareve-sot-ne-kosove

Aksidentet ua morën jetën e 5 qytetarëvesot në Kosovë.

Dita e diel u karakterizuar me shumë fatkeqësi në territorin e Republikës së Kosovës. Aksidentet në trafik morën jetën e 5 qytetarëve, ndërkohë që pati edhe shumë të lënduar.

Fillimisht rreth orës 10:00, pesë persona kanë pësuar lëndime trupore si pasojë e një aksidenti të ndodhur në udhëkryqin e rrugëve “Ukshin Hoti”-“Robert Doll” në Prishtinë.

Lajmin e konfirmoi Flora Ahmeti, zëdhënëse në Policinë Rajonale të Prishtinës.

“Rreth orës 10:30, në udhëkryqin e rrugëve “Ukshin Hoti”-“Robert Doll” , në Prishtinë, ka ndodhur një aksident trafiku. Në këtë aksident kanë qenë të përfshira dy automjete. Bazuar në të dhënat fillestare nga vendi i ngjarjes, pesë persona kanë pësuar lendime trupore. Me rastin po merret njësiti i trafikit rrugor”, tha Ahmeti.

Në pamjet e publikuara shihet se njëra nga veturat është rrokullisur, ndërsa tjetra ka pësuar dëmtime të mëdha.

Pastaj një veturë u kaplua nga flakët teksa po lëvizte nga Hani i Elezit në drejtim të Prishtinës, djegia e saj ndodhi në fshatin Nikaj të Kaçanikut. Në veturë ishin prezent prindërit me tre fëmijët e tyre, shqiptar të Maqedonisë së Veriut. Përveç dëmeve materiale nuk pati njerëz të lënduar, raporton Gazeta Express. Të gjithë shpëtuan mrekullisht.

Mirëpo tragjedia nuk arriti të evitohej në aksidentin që ndodhi në fshatin Koshare të Ferizajt.

Rreth orës 15:37 në rrugën magjistrale Ferizaj –Shtime, në fshatin Koshare të Ferizajt, ndohi një aksident komunikacioni rrugor, ku të përfshira ishin dy automjete civile të udhëtarëve. Si pasojë kanë vdekur 4 persona, ndërsa një është lënduar.

Personi që ka pësuar lëndime trupore është dërguar për trajtim mjekësor në QKUK. Në mesin e viktimave ishte edhe një 12 vjeçare.

“Si pasojë e këtij aksidenti kanë humbur jetën 4 persona dhe është lënduar një tjetër, i cili është dërguar për tretman mjekësor në QKUK-Prishtinë”, ka njoftuar policia, transmeton Gazeta Express.

Mjeku kujdestar në QKMF-në e Ferizajt, Bajram Ajeti ka dhënë detaje për aksidentin e rëndë ku kanë humbur jetën katër persona.

“Rreth orës 15:30 kemi marrë informatën se ka ndodhur një aksident i rëndë. Me të arritur në vendngjarje kemi parë që janë aksidentuar dy vetura. Në veturën e tipit Golf 2 kanë qenë pesë persona dhe në veturën tjetër të tipit Audi kanë qenë 2 persona. Në vendin e ngjarjes kemi marrë një person me lëndime të rënda dhe kemi konstatuar vdekjen e katër personave tjerë. Që të gjithë kanë qenë në veturën e tipit Golf 2. Personat në tipin Audi kanë marrë lëndime pak më të lehta dhe iu është dhënë ndihma në QKMF-në e Ferizajt e më pas janë liruar në shtëpi”, tha Ajeti në RTV Dukagjini.

E pak orë më vonë, në rrugën magjistrale Pejë-Prishtinë, një vetaksident mori jetën e një personi teksa vetura doli nga rruga.

Lajmi u bë i ditur zëdhënësi i Policisë së Kosovës, Daut Hoxha, derisa ka njoftuar se policia ka dalë në vendin e ngjarjes pas aksidentit.

“Rreth orës 19:00, në rr. Pejë -Prishtinë është raportuar për një aksident të rëndë trafiku, ku dyshohet se drejtuesi i automjetit ka humbur kontrollin mbi automjetin dhe është vet-aksidentuar për vdekje”, tha Hoxha.

Policia ka kërkuar kujdes të shtuar në komunikacion.

“Kërkohet kujdes, respektim i rregullave ne rrugë në veçanti respektim i kufizimeve të shpejtësisë në rrugë, sepse humbja e jetëve njerëzore nëpër rrugët tona si pasojë e shpejtësisë referuar edhe raportimeve sot, është tepër shqetësuese për të gjithë”.

Continue Reading

Lajme

Ministrja Gërvalla e uron Izraelin për kryeministrin e ri

Published

on

Ministrja Gërvalla e uron Izraelin për kryeministrin e ri.

Ministrja e Punëve të Jashtme dhe Diasporës (MPJD), Donika Gërvalla-Schëarz, ka uruar Izraelin për zgjedhjen e një qeverie të re, në të njëjtën ditë kur opozita izraelite nëpërmjet mocionit të mos besimit e la jashtë koalicionit udhëheqësin 12-vjeçar të vendit, Benjamin Netanyah.

Kryediplomatja kosovare, përmes llogarisë së saj në ‘Tëitter’, ka shpresuar në thellim të bashkëpunimeve ndërmjet Kosovës dhe Izraelit, derisa e ka falënderuar veçanërisht iniciuesin e mocionit të mos-besimit, Yair Lapid.

“Urime qeveria e re Izraelit dhe mikut tim të ri, Yair Lapid. Po shpresojmë në thellimin e bashkëpunimit ndërmjet dy vendeve tona. Paçi fat!”, thuhet në urimin e zëvendëskryeministres.

Përgjatë ditës së diel, udhëheqësi i opozitës Lapid fitoi mocionin e mosbesimit në Knesset, parlamenti i Izraelit, me 60-59 ulëse, duke e rrëzuar nga pushteti liderin më jetëgjatë në Izrael.

Lapid nuk do të bëhet fillimisht kryeministër. Në vend të tij, sipas një marrëveshje për ndarjen e pushtetit, ish armiku i tij dhe avokati i ekstremit të djathtë, Naftali Bennett, do të kurorëzohet si udhëheqësi i ekzekutivit.

Bennett, i cili ka përjashtuar konceptin e shtetit të Palestinës dhe dëshiron që Izraeli të mbajë në kontroll të gjitha tokat, do të jetë kryeministër për dy vitet e para të një mandati katër-vjeçar përpara se t’i dorëzohet Lapid.

Continue Reading

Lajme

Agim Veliu e quan të pavlerë vendimin për shkarkimin e tij, thotë se Abdixhiku po luan “lojë të ndyrë”

Published

on

Agim Veliu e quan të pavlerë vendimin për shkarkimin e tij nga detyra e kryetarit të degës së LDK-së në Podujevë.

Agim Veliu ka reaguar pasi i është dorëzuar letra e shkarkimit nga detyra e kryetarit të degës së LDK-së në Podujevë nga kryetari i LDK-së, Lumir Abdixhiku. Ai thotë se një vendim i tillë është i pavlerë dhe joligjor teksa ka hedhur edhe akuza ndaj Kryesisë së LDK-së dhe vetë Abdixhikut.

Ai thotë se fillimisht vendimin për shkarkim e ka marrë vesh nga mediat, ndërsa thotë se sot edhe zyrtarisht i është dorëzuar letra nga kryetari Abdixhiku.

“Të dashur anëtarë dhe simpatizantë të Lidhjes Demokratike të Kosovës – Dega në Podujevë. Ashtu siç është informuar tashmë edhe opinioni i gjerë, Kryesia Qendrore e LDK-së më 09.06.2021 ka marrë një vendim, sa skandaloz dhe në kundërshtim me Statutin e partisë, po aq edhe të pamoralshëm, duke caktuar në mënyrë arbitrare kandidatin në garën për Kryetar të Komunës së Podujevës në zgjedhjet lokale dhe në të njëjtën kohë të njëjtit ia delegon të gjitha kompetencat të udhëheqë me Degën e LDK-së në Podujevë. Për vendimin arbitrar dhe të paligjshëm të Kryesisë dhe të Kryetarit Abdixhiku, fillimisht isha informuar përmes mediave. Ndërsa, sot (e diel) më është përcjell vendimi skandaloz i nënshkruar nga kryetari i partisë, i cili nuk shquhet vetëm për shkelje të Statutit të partisë, por edhe për gabime drejtshkrimore, mbase nga ngutia për ta “përligjur” sa më shpejt shkarkimin Kryetarit të Degës në Podujevë”, shkruan Veliu në një status në Facebook.

Veliu këtë e quan “masakaradë” dhe thotë se Abdixhiku po luan “lojë të ndyrë” teksa thotë se vendimi nuk është në përputhje me statutin e LDK-së.

“Tërë kjo maskaradë e Kryetarit Abdixhiku dhe përkrahësve të tij në Kryesi nuk është asgjë tjetër veçse një lojë e ndyrë dhe përpjekje për ta kamufluar vendimin në emër të kinse riorganizimit të brendshëm (lexo: spastrimit të brendshëm), të prezantuar në “Platformën e Kryetarit të LDK-së 2021-2023”. Sado që dikush nga Kryesia u përpoq ta mohojë se ky vendim i paligjshëm e shkarkon Kryetarin e Degës, vetë teksti i vendimit i demanton diletantët e tillë politikë, të ulur në tavolinën e Kryesisë së LDK-së. “Të gjitha kompetencat e udhëheqjes së degës së LDK-së në Podujevë, i kalojnë kandidatit të LDK-së. Kandidati udhëheqë me Kryesinë e degës, zyrën e degës dhe bashkërendon aktivitetet me kryetarët e nëndegëve në Komunën e Podujevës”, thuhet në vendimin e nënshkruar nga Abdixhiku. Madje, me këtë vendim skandaloz mëtohet t’i merren kompetencat, jo vetëm Kryetarit, por edhe Kryesisë së Degës, e cila defaktorizohet plotësisht sipas nenit 4 të këtij vendimi, lidhur me formësimin e listës për asamble komunale”, shton Veliu.

Veliu thotë se do të mblidhet me Kryesinë e degës së LDK-së në Podujevë dhe do të analizojë situatën e krijuar.

“Një vendim i tillë jo legjitim, i atyre që e votuan dhe atij që e nënshkroi, nuk mund të quhet ndryshe, përveçse një atak i rëndë ndaj degës më të suksesshme në të gjitha proceset zgjedhore të pasluftës në Kosovë. As Kryesia e LDK-së dhe as kryetari i saj nuk mund të shkarkojnë as emërojnë një kryetar dege, të zgjedhur në procese të rregullta zgjedhore nga Kuvendi i Degës. Prandaj, për Degën e LDK-së në Podujevë dhe mua si kryetar i saj vendimi i 9 qershorit i Kryesisë Qendrore është jo ligjor dhe i pavlerë. Kryesia e Degës së LDK-së do të mblidhet gjatë ditëve në vijim, do ta analizojë me kujdes situatën e krijuar”, përfundon në reagimin e tij Veliu.

Continue Reading

Lajme

Gjakova shënon nesër ditën e çlirimit

Published

on

Gjakova kremton nesër 22-vjetorin e çlirimit.

Gjakova do të shënojë nesër 14 Qershorin – Ditën e Çlirimit, ku do të kujtohen dhe nderohen dëshmorët e kësaj komune, të cilët luftuan, sakrifikuan dhe flijuan jetën për liri.

Aktivitetet e shumta me rastin e kësaj dite do të fillojnë me homazhe te lapidari “Shokët e lirisë”, në sheshin “Agron Rama”, varrezat e dëshmorëve dhe martirëve në Meje dhe varrezat e martirëve në Çabrat, për të vazhduar me ndarjen e medaljeve për familjet e dëshmorëve të Komunës së Gjakovës.

Një program muzikor për fëmijë do të mbahet në Parkun e madh të qytetit, për të vazhduar me shfaqjen e mozaikut “Djemtë e Asfaltit”, punuar nga Alkent Pozhegu në Pallatin e Sporteve “Shani Nushi”.

Aktivitetet me rastin e 22-vjetorit të çlirimit, do të përfundojnë në mbrëmje me hapjen e ekspozitës kolektive Galeria e Arteve në Pallatin e Kulturës “Asim Vokshi” dhe një koncert festiv në Parkun e madh të qytetit.

Continue Reading

Trending

Copyright © 2020 toplajmet.ch